超级宝贝

千軍萬馬有《神話》，日迷敬仰有《電車男》，賣溫馨則有《童夢奇緣》。而宣傳愈落力，睇完行出戲院個份失望感就愈強烈；反之，睇《世紀大騙兔》，驚喜重大。
驚喜在，幾個泥膠公仔，好戲過真人；興奮在，區區卡通玩剪接，流暢過大製作；過癮在，still animation真係下下用手捽出黎，坐得近銀幕，連指紋印都睇得到。
5年捽1戲，都唔怕冇人記得，亞曼工作室250人親手證明，乜野先係真正既奧斯卡動畫。人狗主角華佬同阿高今次做捉兔專家，專幫人除兔護菜田；為除兔，華佬重諗到幫兔仔洗腦，等佢唔再食菜，點知機器出錯，搞出巨型妖兔「肥野」。故事聽落唔算新鮮，但醒就醒在導演識得點樣同觀眾講故事。
合家歡卡通片，笑位自然唔少得，難得佢唔會剩係玩仆親引下你笑就算，《獎門狗》既笑位全部用腦諗過度過，笑得黎絕唔會同故事主幹脫節，唔講廢話唔徙菲林，完全冇浪費觀眾時間：各式捉兔鬼馬手法、華佬洗兔仔腦失敗出事，以至最後阿高同肥野大戰，救番主人，故事邊笑邊推進，絕無冷場，咁至係高手。
講真，對觀眾黎講，1齣戲究竟用金堆出黎、定用心砌出黎，甚至係用手捽出黎，其實差無幾。但拍好戲，最緊要都係要用個腦捽出黎。
Emotion Layer‧情緒斷層：http://www.emotionlayer.com